AHSEC Class 11 Assamese Question Answer

অধ্যায় ১১: গোট ৩ কবিতা — বৰগীত “জয় জয় যাদৱ” (শংকৰদেৱ)

আৰ্হি প্ৰশ্ন (অতি চমু প্ৰশ্ন)

১। শংকৰদেৱৰ প্ৰথম বৰগীত কোনটো?
উত্তৰঃ শংকৰদেৱৰ প্ৰথম বৰগীত ‘মন মেৰি ৰাম চৰণহি লাগু’ ৷

২। শংকৰদেৱে সংস্কৃত ভাষাত ৰচনা কৰা পুথিখনৰ নাম কি?
উত্তৰঃ শংকৰদেৱে সংস্কৃত ভাষাত ৰচনা কৰা পুথিখনৰ নাম ভক্তি ৰত্নাকৰ ৷

৩। শংকৰদেৱে কেইখন নাট ৰচনা কৰিছিল?
উত্তৰঃ শংকৰদেৱে ছয়খন নাট ৰচনা কৰিছিল ৷

৪। বৰগীতবোৰ কি ভাষাত ৰচিত?
উত্তৰঃ বৰগীতবোৰ ব্ৰজাৱলী ভাষাত ৰচিত ৷

৫। শংকৰদেৱৰ বৰগীতৰ প্ৰধান বক্তব্য কি?
উত্তৰঃ শংকৰদেৱৰ বৰগীতৰ প্ৰধান বক্তব্য হৈছে কৃষ্ণ ভক্তিৰ মহিমা প্ৰকাশ কৰা।

চমু প্ৰশ্ন

১। ‘শ্ৰুতমাত্ৰাখিলত্ৰাতা’ শব্দটোৰ অৰ্থ কি? ইয়াৰদ্বাৰা কাৰ কথা কোৱা হৈছে?
উত্তৰঃ ‘শ্ৰুতমাত্ৰাখিলত্ৰাতা’ শব্দটোৰ অৰ্থ হৈছে—শুনা বা শ্ৰৱণ কৰা মাত্ৰেই পৃথিৱীৰ সকলোকে উদ্ধাৰ কৰা। এই শব্দটোৰ দ্বাৰা ভগৱানৰ কথা কোৱা হৈছে।

২। বৰগীতটিত উল্লেখ থকা দুজন অসুৰৰ নাম লিখা৷
উত্তৰঃ বৰগীতটিত উল্লেখ থকা দুজন অসুৰৰ নাম হৈছে—কেশী আৰু মুৰ।

৩। বৰগীতটিত ভগৱান শ্ৰীকৃষ্ণক কিয় ‘মহদানন্দ কন্দ’ বুলি কোৱা হৈছে?
উত্তৰঃ বৰগীতটিত ভগৱান শ্ৰীকৃষ্ণক ‘মহদানন্দ কন্দ’ বুলি কোৱা হৈছে, কাৰণ তেওঁ পৰম বা মহৎ আনন্দৰ মূল উৎস।

৪। শ্ৰীকৃষ্ণই কোন অৱতাৰত কেনেদৰে বেদসমূহ উদ্ধাৰ কৰিছিল?
উত্তৰঃ শ্ৰীকৃষ্ণই মৎস্য অৱতাৰত প্লাৱনৰ ফলত সৃষ্টি হোৱা প্ৰলয়ংকৰী পানীৰ পৰা বেদসমূহ উদ্ধাৰ কৰিছিল।

৫। বৰগীতটিত শ্ৰৱণ আৰু স্মৰণৰ মহিমা কবিয়ে কেনেদৰে প্ৰকাশ কৰিছে?
উত্তৰঃ বৰগীতটিত কবিয়ে কৈছে যে ভগৱানৰ নাম শ্ৰৱণ বা স্মৰণ কৰা মাত্ৰেই সকলো দুখ-কষ্ট দূৰ হয়। তেওঁৰ নাম উচ্চাৰণে জগতক বিপদৰ পৰা ৰক্ষা কৰে আৰু ভক্তৰ মনোকামনা পূৰণ কৰে।

দীঘল প্ৰশ্ন

১। শংকৰদেৱৰ “জয় জয় যাদৱ জলনিধিজা” বৰগীতটিৰ মূলভাব লিখা।
উত্তৰঃ শংকৰদেৱৰ “জয় জয় যাদৱ জলনিধিজা” বৰগীতটো ভগৱান শ্ৰীকৃষ্ণৰ জয়ধ্বনিৰে আৰম্ভ হৈছে। এই গীতৰ মাজেৰে ভগৱান শ্ৰীকৃষ্ণৰ নাম শ্ৰৱণ আৰু স্মৰণৰ মহিমা প্ৰকাশ কৰাৰ লগতে তেওঁৰ দয়ালু আৰু কৰুণাময় ৰূপ বৰ্ণনা কৰা হৈছে। তেওঁৰ নাম লোৱা মাত্ৰেই সকলোৰে মনোকামনা পূৰণ হয়। কেশী, মধু, মুৰ আদি অসুৰক বধ কৰি তেওঁ জগতত শান্তি প্ৰতিষ্ঠা কৰিছিল। পীতবস্ত্ৰ পৰিধান কৰা কৃষ্ণৰ সৌন্দৰ্য শৰতৰ জোনৰ সৌন্দৰ্যতকৈও অধিক বুলি কবিয়ে উল্লেখ কৰিছে। শেষত কবিয়ে ভগৱানৰ চৰণত সেৱা জনাই নিজৰ নামেৰে ভণিতা কৰি গীতটো সামৰণি মাৰে।

২। বৰগীতটোৰ মাজেৰে ভগৱান শ্ৰীকৃষ্ণৰ পৰম মংগলময় ৰূপ কিদৰে প্ৰকাশ পাইছে বুজাই লিখা।
উত্তৰঃ এই বৰগীতটোৰ মাজেৰে ভগৱান শ্ৰীকৃষ্ণৰ মংগলময় ৰূপ স্পষ্টকৈ দেখা যায়। গীতত উল্লেখ কৰা হৈছে যে তেওঁ ‘শ্ৰুতমাত্ৰাখিলত্ৰাতা’, অৰ্থাৎ তেওঁৰ নাম শুনা বা স্মৰণ কৰা মাত্ৰেই সকলোৰে উদ্ধাৰ হয়। মৎস্য অৱতাৰত তেওঁ প্ৰলয়ৰ পানীৰ পৰা বেদসমূহ উদ্ধাৰ কৰিছিল। কেশী, মধু, মুৰ আদি অসুৰে যেতিয়া জগতত অশান্তি সৃষ্টি কৰিছিল, তেতিয়া তেওঁ সেইবোৰ বধ কৰি শান্তি প্ৰতিষ্ঠা কৰিছিল। তেওঁৰ ৰূপ শৰতৰ জোনতকৈও সুন্দৰ বুলি কবিয়ে বৰ্ণনা কৰিছে আৰু তেওঁৰ চৰণত প্ৰণাম জনাইছে।

৩। বৰগীতটিৰ শ্ৰীকৃষ্ণৰ অপৰূপ শাৰীৰিক অৱয়বৰ বৰ্ণনা কিদৰে কৰা হৈছে বুজাই লিখা।
উত্তৰঃ এই বৰগীতটোৰ মাজেৰে শ্ৰীকৃষ্ণৰ অপূৰ্ব শাৰীৰিক সৌন্দৰ্যৰ বৰ্ণনা কৰা হৈছে। তেওঁৰ ৰূপক শৰতৰ জোনৰ লগত তুলনা কৰি কবিয়ে কৈছে যে তেওঁৰ সৌন্দৰ্যৰ আগত জোনৰ পোহৰো ম্লান হৈ যায়। ‘শাৰদ ইন্দু নিন্দি’ বুলি উল্লেখ কৰি কবিয়ে কৃষ্ণৰ পীতাম্বৰ পৰিধান আৰু সৌন্দৰ্যৰ বৰ্ণনা কৰিছে। লগতে অনন্ত নাগৰ ফণাত শয়ন কৰা তেওঁৰ অপূৰ্ব ৰূপৰো প্ৰশংসা কৰিছে।

৪। বৰগীতটিৰ ভাৱ-ভাষাৰ সৌন্দৰ্য সম্পৰ্কে আলোচনা কৰা।
উত্তৰঃ কোনো কবিতাৰ ভাৱ, ভাষা, ছন্দ আৰু অলংকাৰৰ দ্বাৰা তাৰ সৌন্দৰ্য প্ৰকাশ পায়। শংকৰদেৱৰ “জয় জয় যাদৱ জলনিধিজা” বৰগীতটো এটা গভীৰ ভক্তিমূলক গীত, য’ত বেদ-উপনিষদৰ ভাব দেখা যায়। এই গীতটো আশোৱাৰী ৰাগত ৰচিত। বিষয়বস্তুৰ মহত্ত্ব, সুৰৰ গাম্ভীৰ্য আৰু ভক্তিৰ প্ৰকাশে ইয়াক বিশেষ কৰি তুলিছে। গীতটো ব্ৰজাৱলী ভাষাত লিখা যদিও কবিৰ সংস্কৃত ভাষাৰ দখলে ইয়াৰ সৌন্দৰ্য বৃদ্ধি কৰিছে।

উদাহৰণঃ
“জগত বন্ধুবিধু মাধৱ মধুৰিপু মধুৰ মূৰুতি মুৰনাশী”

ইয়াত অলংকাৰৰ ব্যৱহাৰো সুন্দৰকৈ দেখা যায়। শৰতৰ জোনৰ লগত তুলনা কৰি কৃষ্ণৰ সৌন্দৰ্য অধিক স্পষ্টকৈ প্ৰকাশ কৰা হৈছে।

৫। প্ৰসংগ-সংগতি দৰ্শাই ব্যাখ্যা কৰাঃ

ক) জগজনজীৱন অজন জনাৰ্দন দনুজদমন দুখহাৰী৷ মহানন্দ কন্দ পৰমানন্দ নন্দনন্দন বনচাৰী৷

উত্তৰঃ এই কবিতাখিনি আমাৰ পাঠ্যপুথিৰ অন্তৰ্গত বৰগীতৰ পৰা লোৱা হৈছে। ভগৱান শ্ৰীকৃষ্ণৰ ৰূপ আৰু গুণ বৰ্ণনা কৰিবলৈ গৈ কবিয়ে এই শ্লোকটো ব্যৱহাৰ কৰিছে।

ইয়াত কোৱা হৈছে যে শ্ৰীকৃষ্ণ সমগ্ৰ জগতৰ জীৱনস্বৰূপ আৰু সকলোৰে পালনকাৰী। তেওঁ দুষ্ট শক্তিক নাশ কৰি ধৰ্ম প্ৰতিষ্ঠা কৰে। তেওঁৰ নাম স্মৰণ কৰিলে সকলো দুখ দূৰ হয়। নন্দৰ পুত্ৰ হিচাপে জন্ম লোৱা কৃষ্ণ জগতৰ পৰম আনন্দৰ উৎস। তেওঁৰ মহিমাই সকলো পাপ নাশ কৰে আৰু জগতত শান্তি স্থাপন কৰে।

লেখকৰ পৰিচয়

শ্ৰীমন্ত শংকৰদেৱ অসমৰ মহান সংস্কৃতিবিদ, কবি, নাট্যকাৰ আৰু ধৰ্মপ্ৰচাৰক আছিল। তেওঁ ভক্তি আন্দোলনৰ পথপ্ৰদৰ্শক। তেওঁৰ ৰচনাসমূহে অসমীয়া সাহিত্য আৰু সংস্কৃতিক এক নতুন দিশ দেখুৱাইছে।

Additional / PYQ

১। শংকৰদেৱৰ সাহিত্যিক জীৱনৰ কীৰ্তি কি?
উত্তৰঃ শংকৰদেৱৰ সাহিত্যিক জীৱনৰ কীৰ্তি ‘কীৰ্তন ঘোষা’ ৷

২। শংকৰদেৱে ৰচনা কৰা চাৰিপ্ৰকাৰৰ গীত কি কি?
উত্তৰঃ শংকৰদেৱে ৰচনা কৰা চাৰিপ্ৰকাৰৰ গীত হৈছে—বৰগীত, ভটিমা, টোটয়, চপয়।

৩। শংকৰদেৱে ৰচনা কৰা ছয়খন নাট কি কি?
উত্তৰঃ শংকৰদেৱে ৰচনা কৰা ছয়খন নাট হৈছে—পত্নীপ্ৰসাদ, কালিয় দমন, কেলিগোপাল, ৰুক্মিণী হৰণ, পাৰিজাত হৰণ, ৰাম-বিজয়।

৪। শংকৰদেৱৰ অনুবাদমূলক গ্ৰন্থ কি কি?
উত্তৰঃ শংকৰদেৱৰ অনুবাদমূলক গ্ৰন্থ হৈছে—ভাগৱত আৰু উত্তৰাকাণ্ড ৰামায়ণ।

৫। শংকৰদেৱে ৰচনা কৰা দুখন নাম-প্ৰসংগমূলক গ্ৰন্থৰ নাম লিখা।
উত্তৰঃ শংকৰদেৱে ৰচনা কৰা দুখন নাম-প্ৰসংগমূলক গ্ৰন্থ হৈছে—কীৰ্তন ঘোষা আৰু গুণমালা।

৬। শংকৰদেৱে ৰচনা কৰা কাব্যসমূহ কি কি?
উত্তৰঃ শংকৰদেৱে ৰচনা কৰা কাব্যসমূহ হৈছে—হৰিশ্চন্দ্ৰ উপাখ্যান, ৰুক্মিণী হৰণ কাব্য, বলি-ছলন, অমৃত-মন্থন, অজামিল উপাখ্যান, কুৰুক্ষেত্ৰ।

৭। শংকৰদেৱে ৰচনা কৰা ভক্তিতত্ত্ব প্ৰকাশক গ্ৰন্থসমূহ কি কি?
উত্তৰঃ শংকৰদেৱে ৰচনা কৰা ভক্তিতত্ত্ব প্ৰকাশক গ্ৰন্থসমূহ হৈছে—ভক্তি প্ৰদীপ, ভক্তি ৰত্নাকৰ, নিমি নৱসিদ্ধ সংবাদ, অনাদিপাতন।